Mambo Muhimu Ya Kuzingatia Wakati Unamuomba Msamaha mPenzi Wako Pale Mnapokuwa Katika Mahusiano.

Kukosea katika maisha ya binadamu ni kawaida pia ni sehemu ya maisha, inaaminika kwamba kukosea ni kujifunza, maana kosa utakalofanya leo ni funzo la kesho. Hii ipo pia hata katika mahusiano ya kimapenzi

Hakuna cha ajabu ni kawaida kabisa lakini jambo la msingi hapo ni kwa namna gani tunajifunza kupitia makosa, ni kwa jinsi gani tunamaliza tofauti hizo, maana unaweza kuwa hodari wa kukosea au ukawa bingwa wa kusamehe, lakini wimbo huo ukaendelea kubaki hivyo hivyo kila siku, Mtembezi Mahaba inakuletea njia pekee za kuomba msamaha kama ifuatavyo.

KOSA LINA UKUBWA GANI?
Hapa tayari umeshagundua kwamba umemkosea mpenzi wako na ni kweli kwamba unaumizwa sana na kosa lako, lakini kwa sababu hujamwambia chochote, naye hana raha na wewe, hivyo hatokuwa na amani ya moyo.

Hapa unashauriwa kutulia na kutafakari ukubwa wa tatizo, kufahamu ukubwa wa tatizo kutakupa muongozo mzuri  wa jinsi ya kutatua tatizo hilo. Angalia ulimfanyia nini na kwa kiwango gani?

ONESHA UNAVYOJUTA
Hii ni kwa ajili yako wewe mwenyewe, rafiki zangu, kutakuwa hakuna maana yoyote kuomba msamaha wa kinafiki au kuomba msamaha ili kumaliza mambo, kama msamaha wako haujatoka moyoni.

Ukiwa peke yako, jiaminishe kwamba umekosea na kwa hakika unahitaji kusamehewa, jutia ndani ya moyo wako, kwa dhati kabisa ukiwa na ahadi kwamba hutarudia tena,hili ni zoezi la kisaikolojia, ambalo litakusaidia baadaye wakati ukikutana na mpenzi wako kwa ajili ya kuomba msamaha.

KUWA MKWELI
Omba kukutana naye yawezekana hata mawasiliano si mazuri sana, lakini hapa jitahidi kumuomba mkutane, ikishindikana, tumia mtu wa karibu  na yeye. Omba kutoka naye kwa ajili ya kuzungumza.

Mwambie jinsi unavyoteseka na jinsi msivyo katika maelewano mazuri, kauli yako ya ukweli, hisia zako wakati wa kuzungumza, ndivyo vitakavyokuweka katika mazingira mazuri ya kuweka mambo sawa.

MHAKIKISHIE HUTORUDIA KOSA
Bila shaka, kama utakuwa umefuata taratibu zote hizo kwa umakini, uwezekano wa kusamehewa ni mkubwa sana na haya ndiyo matarajio yangu, naamini hata wewe pia, lakini ili msamaha huo ukamilike, mhakikishie mpenzi wako kuwa hutorudia tena.

Mwambie kwa kumaanisha, kwamba umegundua udhaifu wako na haupo tayari kumfanya tena asiwe mnyonge, hakuna uchawi ni maneno tu!

 FANYA KITU MAALUM
Hapa unatakiwa kufanya kitu maalumu kwa ajili ya mpenzi, ukionesha kwamba umekubaliana na msamaha wake na mambo yameisha. Kitu utakachokifanya hapa utalinganisha na ukubwa wa kosa kama nilivyosema awali.

Mathalani unaweza kutoka naye na kwenda kulala naye hotelini, ukihakikisha unampa mahaba mazito kama shukrani kwake. Yapo mengi ambayo unaweza kuyafanya kulingana na uwezo wako kifedha. Fanya vyovyote ili kosa lile lisahaulike moja kwa moja.